24 de marzo de 2008  Os socios do club eumés reunidos en asemblea xeral o pasado domingo-23, aprobaron o proxecto de actividades e de orzamentos para a tempada 2008. O EQUIPO DE COMPETICIÓN formado por preto de douscentos padexeiros, e que iniciou a súa preparación o pasado mes de outubro, ten como obxectivo a participación do club na 6ª edición da LIGA NACIONAL DE PIRAGÜISMO e na COPA XUNTA DE GALICIA, que serán a principal actividade competitiva na que tome parte o club buscando colocarse nas primeiras prazas de clasificación. O deseño de competicións que se estableceu para a tempada 2008 obrigará aos eumeses a realizar preto de cincuenta desprazamentos para estar presentes nas competicións máis importantes de carácter autonómico e nacional. Non podemos despistarnos e esquecer que o club é unha entidade de carácter social que celebra e organiza outras actividades como son as da formación permanente, o goce da piragua como medio de mantemento físico-emocional (EQUIPO DE LECER-TURISMO), e as dirixidas á captación turística (programa FIRRETE-AVENTURA). Toda iso, sumado ás actividades expostas dende a ESCOLA MUNICIPAL DE PIRAGÜISMO, permitirá que máis de dúas mil persoas gocen da piragua nun contorno envexable como é o da ría de Ares, río Eume e as Fragas do Eume, nas que se atopa o fermoso enclave de Caaveiro; o que fai do club Náutico Firrete un dos máis importantes de Galicia no deporte do Piragüismo.
O club eumés conta cun orzamento de 125.000,00 euros para levar ao cabo todos os seus programas.
|
